Cîgira Hevserokatiya Tevgera Azadî ya Civaka Kurdistanê (Tevgera Azadî) Tara Hisên li dijî dagirkeriya dewleta Tirk a li ser xaka Başûrê Kurdistanê û bêdengiya rêveberiya Herêma Kurdistanê ya li ser êrişan daxwaz ji hêzan kir ku bi hev re ji bo parastinê eniyekê ava bikin û got ku di navbera welatparêzî û dagirkeriyê de ti kes nikare bêje ez bêalî me.
Cîgira Hevserokatiya Tevgera Azadî ya Civaka Kurdistanê (Tevgera Azadî) Tara Hisên têkildarî êrişên dewleta Tirk a li ser xaka Başûrê Kurdistanê ji Rojnews’ê re axivî û banga helwestê ji her kesê kir.
Tara Hisên eşkere kir ku armanca Tirkiyeyê vegrandina wîlayeta Mûsil û zindîkirina Mîsakê Millî ye û got: “Bi salane bi hîncetên cuda ji bo vê armancê bi operasyonên bi navê cuda êriş dike li ser çiyayê Başûrê Kurdistanê. Ev êrişên ku niha Tirkiye dike, hewlanek komkujî û jenûsîdê ye. Divê neyê ji bîrkirin ku Tirkiyeyê êrişên dema dawiyê, di dîroka komkujiya Ermeniyan de destpê kir. Ev ji peyameke. Tirkiye vê peyamê dide, ‘em di komkujî û jenosîdan de berdewan im.’ ”
Tara Hisên ji ber bêdengiya aliyên siyasî, hinek kanalên ragihandinê û rêxistinên mafên mirovan a li hemberî dagirkeriya dewleta Tirk fikarên xwe anî ziman û diyar kir ku divê her kes hewlda gihandina rastiya êriş û dagirkeriya dewleta Tirk eşkere û zelal bike.
Tara Hisên wiha domand: “Weke Tevgera Azadî em ê heta dawiyê parastina xak û destkeftiyên bi xwîna hezaran şehîdan bi destkeftine bikin. Divê her kes helwesta xwe ya li hemberî dijmin diyar bike. Ji ber ku di navbera dagirkeriyê û welatparêziyê de ti kes nikare bêje ez bê alî me. Di dîrokê de ti kes nikare veşêre ku bêdengî û bêhelwestî li gel dagirkeriyê ye. Eger desthilat û aliyên siyasî bêhelwest û bêdeng bimînin, bêguman wê li ber nefreta gel û dîrokê bikevin.”
Herî dawî Tara Hisên bang li aliyên xwe weke muxalefet dibînin kir û got: “Ew ên di eniya gel de ne werin bi hev re ji bo parastina destkeftiyên gel û li dijî dagirkeriyê eniyekê ava bikin.”
(ab)
