Silêman Helşoyî keseke ku bi rojane li ser çapemeniya Başûr bûye rojev. Bi sedan kes dibêjin wan pere û mal bi faîz dane Silêman Helşoyî. Helşoyî jî di çend rojên borî de diyarkiribû ku wî îflas kiriye. Her çiqas Helşoyî hatiye binçavkirin jî, lê xwediyên deynan dibêjin ger pirsgirêka wan neyê çareserkirin wê pirsgirêkên civakî rû bidin. Parêzerek jî diyarkir li gorî yasayê wê Helşoyî were berdan.
Çend saleke li sinorê îdareya Raperîn hinek kes hene bazirganiyê dikin, bi awayê faiz ji welatiyan wesayît, zevî, xanî, heywan, demance werdigrin û piştî çend mehek pereyê wan cardin didinê. Yek ji van kesên ku vê bazirganiyê li devera Raperîn dikir jî kesê bi navê Silêman Helşoyî bû. Tê gotin ku Silêman Helşoyî ragihandiye wî iflas kiriye. Li aliyê din jî bi sedan kes dibêjin pere û malê wan li cem Helşoyî maye. Gelek kesan ji ber vê yekê gilî li ser Helşoyî tomarkirine û gelek kes jî xwe amade dikin gilî li ser tomar bikin.
Temenê Silêman Helşoyî 28 sale, di demên derbasbûyî de her kesek pere dabitê wî di dema xwe de li gel faiza pereyê wî pereyê wî didayê. Her çiqas niha bi sedan kes dibêjin pereyê wan li cem Silêman Helşoyî heye, lê diyar jî dikin ku ti belgeyek yan jî nivîsek yasayî ku wan pere bi Helşoyî dabe tine ye. Tenê di navbera van kesan û Helşoyî de kaxezek ku wan bi destê xwe nivîsandine û îmze kirine heye.
Senger Îsmaîl yek ji wan welatiyane ku dibêje wî wesayîta xwe firotiye Silêman Helşoyî û pereyê xwe wernegirtiye. Senger got, “Min bi qista sê mehan wesayîta xwe firotibû Silêman Helşoyî, wek şexs baweriya min pê dihat. Ji berku ji beriya niha pereyê xwe di dema xwe de dida. Niha daxwaza me ewe ku Silêman were di nava gel de çawaniya îflasbûna xwe bi awayek rast ji gel re bêje.”
Welatiyê bi navê Îsmaîl Mihemed jî got, “Min bi xwesteka xwe 40 hezar dolar da Silêman û min mala xwe wêran kir.”
Welatiyê bi navê Hêriş Ebdullah jî da zanîn ger hikûmet vê pirsgirêkê çareser neke wê pirsgirêk mezin bibe û dibe ku pirsgirêkên civakî rû bidin. Ji bona wê divê di demek zû de ev pirsgirêk were çareserkirin.
Têkildarî girtina Helşoyî duh Berdevkê Rêveberiya Polîsên Raperîn Şoreş Îsmaîl di civînek çapemeniyê de got, Helşoyî li gel 19 kesên din li gorî madeya 456 ya cezayan a Iraqê hatine binaçavkirin û lêkolîna di gel wan de berdewame.
Her wiha Şoreş Îsmaîl da zanîn heta niha 50 welatiyan li ser Helşoyî gilî tomarkirine û nêzî 500 welatiyên din jî navê xwe tomarkirine ji bo gilî li ser Helşoyî tomar bikin.
Têkildarî binçavkirina Silêman Helşoyî û aliyê wê yê yasayî Parêzer Rêbîn Sebah, li ser hesabê xwe yê facebook’ê nivîsiye; “Dema ku Silêman Helşoyî were dadgeh kirin, wê ji tevayî giliyên ku li dadgeha Ranyayê li ser hatine tomarkirin, rizgar bibe û were berdan. Ji berku madeya 456 a yasayên cizayên Iraqê ti eleqeyek xwe bi vî şêwazê wergirtina pere ve nine. Di yasa cezayan a Iraqê de bendek heye dibêje ti kesek li ser karekî ku li gorî yasa cezayan a Iraqê ne suc be, nayê cezakirin.”
(kş)
