Xizmên şehîdên komkujiya gundê Tûteqel ya ser bi bajaroka Axcelerê diyar dikin, bi bombebaranên Tirkiye birînên wan yên enfalê careke din vebûne û dibêjin, “Êrîşên dewleta Tirk êrîşên Baas’ê bibîra me dixe. Careke din birîna me ya enfalê vekir. Heya niha jî ti berpirsek serdana me nekiriye. Divê ev êrîşa Tirkiye di asta navnetewî de bibe rojev, ji bo êdî dûbare nebin.”
21’ê Gulanê balafira bêmirov û biçek ya artêşa Tirk a dagirker li gundê Tûteqel ya bajaroka Axceler ya ser bi Çemçemalê êrîşê wesayîtekî kiribû. Di encamê de 5 kes jiyana xwe ji dest dabûn ku du ji wan xelkê Axcelerê bûn. Di merasîma sersaxiyê de xizmên şehîdên Axcelerê nerazîbûn nîşana bêdengiya rayedarên Herêma Kurdistanê û Iraqê dan û xwestin komkujî di asta navnetewî de bikeve rojevê.
Raber Hemze ku yek ji xizmên şehîdên Axcelere daxwaz ji desthilata herêmê kir hedek ji zêdegaviyên dewleta Tirk re deyne û got: “Di van êrîşan de welatî jî tên hedef girtin. Pêwîste hikûemta herêmê û ya Iraqê li beramber van êrîşan bêdeng nemîne. Ji ber herêma me ji sînorê wan gelekî dûre. Eger ev aliyane helwest nîşan nedin dibe felaketên mezintir jî bi ser me de werin. Du şehîdên me ji enfal rizgarbûbûn. Bi vî karî Tirkiye careke din birîna enfal xwînkirin.”
Welatiyê bi navê Ebdulla Mihemed jî diyar kir herêma wan herêma Enfale û Kurdayetiye û ev rexne li desthilata Herêma Kurdistanê kir: “Piraniya şoreş li vê herêmê çêbûne. Ji ber vê gelek qurbaniyên me yên enfalê hene û şehîdên me li vê herêmê hene. Wê demê bi destê rejîma Baas ya hatiye rûxandin çêdibû, niha jî bi destê dewleta Tirk a dagirker axa me bombebaran dike. Evqas roje li ser bombebarana Tirkiye re derbasbûye, lê heya niha ti aliyekî peywendîdar serdana me nekiriye.”
Xizmekî din ê şehîdên Axcelerê Ferîdûn Ecîb jî daxwaz kir ev êrîşane û bi taybet jî komkujiya li gundê Tûteqelê di asta navnetewî de were destgirtin û bi vî awayî pêşî li êrîşên Tirkiyeyê were girtin.
Xizmekî din ê şehîdan Bêbak Hisên jî got: “Herêma me yekemîn herêma ber pêla enfalê ketiyeye. Weke xelkê herêmê jî me kedeke mezin di ber Kurdayetiyê de daye. Niha jî van herêmane bombebaran dike. Ev êrîşên dewleta Tirk êrîşên Baas’ê bibîra me dixe. Em daxwazê ji hikûmeta Iraq û herêmê dikin, helwest nîşan bidin, çareseriyek jêre bibînin ku, dûbare nebin.”
Roja 21’ê Gulanê balafirên bêmirov û biçek yên dewleta Tirk a dagirker wesayîtek li gundê Tûteqel a ser bi bajaroka Axceler ya girêdyaî Çemçemalê bomberbaran kiribû, di encama êrîşê de pênc kes şehîdbûbûn ku du ji wan xelkê herêmêbûn û navê wan Aram Hacî Kake Xan û Îsmaîl Îbrahîm bûn.
(bz)
