Endamê Lijneya Peywendiyên Derve ya Parlamentoya Iraqê Amir Fayiz bang li Hikumeta Iraqê kir da ku dijî êriş û bombebarana dewleta Tirk ya li ser Herêma Kurdistanê tedbîrên pêwîst bigre.
Endamê Lijneya Peywendiyên Derve ya Parlamentoya Iraqê Amir Fayiz derbarê helwesta hikumeta Iraq ya li ser êrişên dewleta Tirk a dagirker ên li ser xaka Iraqê, ji Rojnews re axivî.
Amir Fayiz got ku Hikumeta Iraqê heya niha jî dijî dagirkerî û bombebarana dewleta tirk ya li ser Herêma Kurdistanê, ti tedbîrek pêwîst negirtiye. Fayiz da zanîn ku li hemberî êriş û bombebarana dewleta Tirk, nerazîbûnek tund nehatiye raberkirin û wiha dom kir; “Ji bo tedbîrên dijî hêzên dewleta Tirk yên li Bakurê Iraqê (Başûrê Kurdistan) emê daxwazên xwe carek din nû bikin. Bi milyaran dolar bazirganî tê kirin, em xwediyê kerta guhertina bazirganiyê ne. Divê ev yek bi aliyên Tirkiyeyê re were bikaranîn û liv û tevgera wan ya li Iraqê were sînordarkirin.”
Di dawiya axaftina xwe de jî Fayiz got; “Divê Hikumet ji bo rawestandina êrişên dewleta Tirk, tedbîrên pêwîst bigre. Tirkiye rêzê li serweriya xaka Iraqê nagre, lewre di qada navnetewî de divê doz lê were vekirin.”
(nr)
