Dezgeha Lûtke ya ji bo penaberan, ragihand îro hêzên deryayî yên Yewnanîstanê zêdetirî 150 penaber vegerandine ku di nava wan de 57 kes hemwelatiyên Iraqê ne.
Dezgeha Lûtke ya ji bo penaberan, li ser hesabê xwe yê facebookê ragihand, îro zêdetirî 150 penaber di deryaya Ege de ku derbasî sinorê avî yê Yewnanîstanê bibûn, ji aliyê hêzên Yewnanîstanê ve ji bo Tirkiyeyê hatin vegerandin.
Li gorî daxuyaniya Dezgeha Lûtke, hêzên parastina sinor ên Tirkiyeyê 30 penaberên ku ji aliyê Yewnanîstanê ve hatibûn vegerandin, binçavkiriye.
Her wiha hate gotin 124 koçberên ku di derya Ege de ji aliyê hêzên Tirkiyeyê ve hatin binçavkirin, ji wana 57 Iraqî ne, 51 welatiyên Suriyeyê ne, 12 welatiyên Îranê û 4 kes jî welatiyên Efganîstanê ne.
Salane bi hezaran welatiyên Iraq û Herêma Kurdistanê ji bo herin welatên Ewropayê, di ser Tirkiyeyê re derbasî Yewnanîstanê dibin. Gelek ji van koçberan di rê de tên girtin yan jî di deryayê de di xeniqin.
(kş)
