Qeyrana siyasî ya li Iraqê roj bi roj kûrtir dibe, ne serokkomar tê hilbijartin ne jî hikumetê tê avakirin. Xelkê Iraqê ditirse carek din alîgirên Sedir dakevin kolanan û nerazîbûn çêbibin. Parlamenterên Iraqê derbarê qeyrana siyasî ya li Iraqê de gotin; “Zêdetirî xwe hemû aliyên siyasî dixwazin parlamento dest bikarê xwe bike û hikumeta nû were avakirin.”
Qeyrana siyasî ya li Iraqê roj bi roj kûrtir dibe, beriya çileya Îmam Hisên li Iraqê alîgirên Tevgera Sedir daketibûn kolanan û ketibûn avahiya parlamentoyê. Bi destpêkirina çileya Îmam Hisên re bêdengî serwer bû. Lê ev bêdengî dibe ku bi xwere serîhilandanek din bîne.
Aliyên siyasî li hemberî Tevgera Sedir hewl didin parlamento carek din dest bi karê xwe bike û bicivin. Ger ev yek çêbibe, çavdêrên siyasî dibêjin wê bibe sedema nerazîbûna aliyên Tevgera Sedir. Ji bo wê di be ku carek din li Herêma Kesk a Bexdayê alîgirên Sedir dakevin kolanan û heman bûyerên di 28’ê Tebaxa 2022’an de rû bidin.
Berdevka Hevpeyamana Nesir, Ayet Muzefer ku serokatiya wê Heyder Ebadî dike, derbarê aloziya li Iraqê de ji Rojnews re axivî. Ayet Muzefer dibêje; “Pêşbîniyek heye ku parlamento di demek nêzde ji bo temamkirina pêngavên destûrî ya ji bo pêkanîna hikumeta nû kom bibe. Ev daxwaza pêkanîna hikumeta nû biryardana ji bo hilbijartinek pêşwext ya hepveymana meye jî. Zêdetirî aliyên din jî vê yekê dixwazin.”
Dihat payîn piştî dawîbûna çileya Îmam Hisên, nûnerên PDK’ê, Sune û Çarçoveya Hemahengî serdana Necef bikin û cara dawî ji Sedir bixwazin tevlî hikumetê bibe. Lê heya niha ev serdan pêknehatiye û nayê zanîn wê kengê çêbibe.
Parlamenterê berê yê Iraqê Kazim Siyadî derbarê heman mijarê de ji Rojnews re axivî. Kazim got ku Çarçoveya Hemahengî li ser namzetiya Mihemed Şiya Sudanî ya ji bo serokwezîrtiya Iraqê bi israre, lê Sedir piştgiriya mayîna Kazimî dike. Siyadî da zanîn ku ev yek bûye sedema nakokiya di navbera Tevgera Sedir û Çarçoveya Hemahengî de.
Di dewama axaftina xwe de Kazim Siyadî dibêje; “Ji bo hikumeta nû Mihmed Şiya Sudanî xwedî bernameyek bihêze, ev jî li ser hinek aliyên din bûye cihê metirsiyê, bi taybet li ser Sedir. Hilweşandina parlamentoyê nayê qebûlkirin, eger hîn zêdetir civîna parlamentoyê were paşxistin, parlamenter dikarin cihê serokê parlamentoyê Mihemed Helbûsî bigrin.”
Duh çavkaniyek ji nav Eniya Hîkme ragihand, Îran peyama xwe gihandiye aliyên Şûî, ragihandiye ku ew ne bi pêkanîna hikumetek nû re ku Sedir û kolanên Iraqê dijberiya wê bikinin.
Parlamenterê serbixwe yê Iraqê Basim Xeşan jî li ser heman mijarê ji Rojnews re axivî û got; “Her lihevkirinek Tevgera Sedir û Çarçoveya Hemahengî ya ji bo pêkanîna hikumetê ya yek salî, wê bandorek xirab li ser pêkanîna hikumetê bike.”
