Serokê Yekîtiya Zanayên Misilman ragihand ku Tirkiye li Herêma Kurdistanê sûcên şer dike û ji hêzên niştîmanî xwest ku pêşiya êrişên Erdogan bigirin.
Ligel ku dewleta Tirk a dagirker 14’ê Nîsanê êrişeke dagirkerî li ser Herêma Kurdistanê daye destpêkirin, doh êvarê êrişê welatiyên gundê Zêweser a navçeya Bamernê ya Behdînanê kir ku di encamê de du zarok şehîd bûn û kesek din jî birîndar bû.
Serokê Yekîtiya Zanayên Misilman Cebar Meimûrî ji rojnamevanan re ragihand; “Bombebarankirina gundên aram ên li çiyayên Kurdistana Iraqê ji aliyê balafirên şer ên Tirkiyê û hêzên wê sûcê şer e.”
Meimûrî her wiha destnîşan kir ku di encama wan êrişan de bi dehan welatî bûne qurbanî û bi hezaran malbat ji ber wan sûcên şer koçber bûne, ji bo parastina berjewendiya hin hêzan jî rastiyan ji ragihandinan vedişêrin.
Serokê Zanayên Misilman bertek nîşanê bêdengiya Barzanî û hevpeymanan wê da û got: “Bêdengiya Barzanî û hevpeymanan a li hemberî bûyerên ku li Herêma Kurdistanê diqewime tê wateya ku ji bo hêzên Tirk çira kesk pêbixe da ku hêzên Tirk bi dijwarî û bi awayeke hovane gundan bombebaran bike; pêwîste hêzên niştîmanî pêşiya şerê Erdogan bigirin.”
Meimûr dewleta Tirk wek hêzeke dagirker ê xaka Iraqê pênase kir û wiha pêde çû; “Tirkiye hêzeke dagirker li Iraqê ye û bi hêceta şerê li dijî PKK’ê navçeyên mezin ên bakurê welat dixe bin kontrola xwe.”
