BIRWA ESHED / ROJNEWS
Rojnameger û Aktîvîst Umêd Beroşkî diyar kir ku tevî ku bi sûcên nerast hatin cezakirin û di girtîgehê de di rewşek xerab de bûn, piştî ku hatine berdan ji aliyê hêzên ewlehiyê yên Hewlêr û Dihokê ve tên şopandin û zext li ser wane.
Di 18’ê Tebaxa sala 2020’an de di dema xwepêşandana mamostayan a li dijî derengketina mûçe de li Dihokê Umêd Beroşkî li gel hinek çalakgerên din hatibûn girtin. Li Dihok û Hewlêrê li dijî 7 doz hatibûn vekirin. 3 sal û 6 meh ceza lêhate birîn. Berê jî bi 240 hezar dînar hatibû cezakirin.
Piştî ku dosya wî li ber çavan re hate derbaskirin, dadgehê cezayê wî salek kêm kir û bi berdana mercdar roja 22’yê Sibata 2022’yan bi awayê ku heta 3 salên din her dema ku dadgeh bixwaze dikare bavêje girtîgehê berda.
Rojnameger û Aktîvîst Umêd Beroşkî diyar kir ku di çarçoveya pêla girtinê ya desthilatê ya li dijî rojnameger û dengên azad de li Bedhînan hatibû girtin û got: “Weke kes li dijî min bi xwe 7 doz hatine vekirin ku hemû dosyayên rojamegerî û daxwazkirina mafên welatên Herêma Kurdistanê bû.”
‘Nabe ji ber karê rojnamegerî ti kes were girtin’
Beroşkî girtina rojnameger û aktîvîsan a ji ber mafê welatiyan binpêkirina pîvanên mafên mirovan û yasayên navdewletî pênase dike û wiha domand: “Nabe ji ber karê rojnamegerî ti kes were girtin.”
‘Rewşa girtiyan gelek xerabe’
Beroşkî têkildarî rewşa girtiyên di girîgehê de jî got: “Hemû girtî di girtîgehê de rewşa wan gelek xerabe. Ji ber ku ti pîvanên mafên mirovan têde nîne. Di nava yek hucreyê de 130 heta 140 kes dimînin. Ji ber qelebalixiya di nava girtîgehê de tûşî nexweşiyek taybet a çerm bûbûn ku heta astekê çareserina wê jî zehmete. Sedema wê jî xwehdana zêde ya girtiyan a ji ber pileya germa zêde bû.”
‘Hîn zext hene’
Beroşkî bal kişande ser zextên hêzên ewlehiyê yên piştî hatine berdan li ser tên meşandin û got: “Heta niha ji aliyê desthilat û saziyên ewlehiyê ve zext li ser me hene. Em bi merc hatine berdan. Li dadgeha Hewlêrê 5 sal û li dadgeha Dihokê 3 sal ji bo çavdêriya me hatiye diyarkirin. Eger careke din bêne girtin wê me bi çend salan ceza bikin. Bi awayek giştî rewşa girtiyên siyasî li Herêma Kurdistanê û bi taybet jî girtiyên dosya Behdînan ku niha 2 beş in, beşek hatine cezakirin û beşek jî hîn nehatine dadgehkirin, di warê tendurisî û rewşê de di astek xerab de ne.”
Bang ji bo welatiyên Başûrê Kurdistanê
Rojnameger û Aktîvîst Umêd Beroşkî di dawiya axaftina xwe ev peyam pêşkêşî welatiyên Herêma Kurdistanê kir: “Hêvîdarim ku welatiyên Herêma Kurdistanê piştgiriya xwe ya ji bo girtiyên Behdînan ên hîn di girtîgehê de ne berdewam bikin. Daxwazkirina mafên wan û xwe berdewam bikin.”
(ab)
