Wezareta Îtlaatê ya Îranê li gundên Şinoya Rojhilatê Kurdistanê herî kêm 8 kes bi îdîaya endamtiya ji hêzeke siyasî ya Rojhilatê Kurdistanê re binçav kir. Berpirsê Peywendiyên Derve ya HDK’ê jî agahiya binçavkirina gelek kesan piştrast kir.
Wezareta Îtlaatê ya Îranê li ser medya fermî ya Îranê agahiya binçavkirina gelek kesan li bajarê Şino ya Rojhilatê Kurdistanê parve kir.
Îtlaatê îddîa kir kesên hatine binçavkirin, endamên grûbekîne ku ji aliyê Herêma Kurdistanê ve derbasê Rojhilatê Kurdistanê bûne.
Li gorî îdîaya Îtlaatê kesên hatine binçavkirin, ji bo teqandin û çalakiyan derbasê Rojhilat bûne. Lê li gorî torên ragihandinê yên Rojhilat operasyon ji ber bîranîna Dr. Qasimlo bûye.
Li ser agahiyê me peywendî li gel Berpirsê Peywendiyên Derve yê Hizba Demokrata Kurdistanê (HDK) Îsmaîl Rehmanî saz kir. Rehmanî agahiya binçavkirina herî kêm 8 welatiyan piştrast kir û dazanîn, ew heya niha nizanin ka kesên hatine binçavkirin endamên wanin an welatîne.
Li gorî gelek torên ragihandinê yên Rojhilatê Kurdistanê û agahiyên ku Rehmanî daye ajansa me operasyon li ser gundên Sîngan û Bêmûzûrtê yên Şinoyê çêbûne. Heya niha nasnameya 7 kesên hatine binçavkirin zelal bûye. Li gorî dezgehên ragihandinê, navê kesên hatine binçavkirin wiha ne;
Ferheng Keramet
Pîrot Tabnak xelkê gundê Sîngan
Siyamend Alanî
Xoşnaw Aynî
Faran Ebrahîmî
Rehman Safixî
Muhamed Tahazade
(bz)
