Parlementoya Iraqê wê sibe li ser projeya yasayî ya sûcnaskirina asayîkirina peywendiyên li gel Îsraîlê bicive. Li gorî vê proje yasayê her kesê ku peywendî li gel Îsraîlê hebe, yan wê were darvekirin yan jî wê cezayê heta heta yê zîndanê lê were birîn.
Serokatiya Parlementoya Iraqê bi daxuyaniyekê ragihand ku wê sibe di seat 11:00’an de parlemento li ser yek mijarê kom bibe. Di rûştinê de wê dengdan li ser projeya yasaya sûcnasandina asayîkirina peywendiyên li gel Îsraîlê pêk were.
Li gorî reşnivîsa proje yasaya Parlementoya Iraqê her cure peywendiyên fermî û ne fermî di asta kesî û civakî de li gel Îsraîlê, di nava sînorên Iraqê yan jî derveyî Iraqê wê cezayê darvekirinê yan jî cezayê hetahate yê girtîgehê be.
Reşnivîsa proje yasaya Parlementoya Iraqê wiha ye:
1-Iraqiyên di nava welat û li dervey welat, karmend û berpirsên hikumetê, ew kesên ku ji bo xizmeta giştî hatine erkdarkirin, leşker û kesên biyanî yên di nava Iraqê de niştecihbûyîn.
2-Hemû saziyên dewlet û desthilatdarên federal û desteya serbixwe.
3-Hikumetên herêmî, desteyên parlementoyê û tevahî karmend û saziyan.
4- Walî û meclisên parêzgehê yên nerêxistinkirî yên li herêmekî, yekeyên xwecihî û rêveberiyan.
5-Saziyên ragihandinê yên Iraqê.
6-Amrêzên peywendiyên civakî.
7-Sazî û rêxistinên civakî yên li Iraqê.
8-Kompanyayên taybet, kompanya û saziyên biyanî û hilberînkaran.
Her wiha li gorî heman proje yasayê geştkirina ji bo xaka Îsraîl, serdana balyozxane û saziyên Îsraîlê yên li her welat cîhanê qedexeye. Di heman demê de peywendî kirina bi her şêweyê li gel Îsraîlê û nûnerên wan bike ku kes yan sazî yan jî rêxistinek be li ser çi mebestê be; çandî, siyasî, zanistî, bazirganî, aborî, ragihandin, ewlehî û her navnîşanek din qedexeye.
Di beşek din ya proje yasayê de tê ragihandin ku sazkirina her cure peywendiyên li gel Îsraîl qedexeye ku ji ber çi sedemek wek dîplomasî, aborî, siyasî, serbazî, çandî yan her çi peywendî din be.
Rêberê Tevgera Sedir Muqteda Sedir di 24’ê Nîsanê de di Twetterê de wiha eşkerekiribû: “Yek ji sedemên ku wisa kir em carek din biçin proseya hilbijartinê, mijara asayîkirina peywendiyên li gel Îsraîlê û çavberdana Îsraîlê ya li ser Iraqê bû.”
(fk)
