Şandeyek ji Nûnertiya HDP’ê ya Herêma Kurdistanê serdana Yekîtiya Parlementerên Kurdistanê ya li Hewlêrê kir. Di serdanê de li gel guftûgokirina rewşa giştî Kurdistanê, bi taybet zextên li ser welatparêzên ji Bakurê Kurdistanê jî hatin gotûbêjkirin.
Îro şandeyek ji Nûnertiya Partiya Demokratîk ya Gelan (HDP) ku ji Nahîde Ermîş, Rûkiye Mercan û Hîkmet Hatîp pêktê, li Hewlêrê serdana Yekîtiya Parlementerên Başûrê Kurdistanê kir. Şandeya HDP’ê ji aliyê Serokê Yekîtiya Parlementeran Cemal Qasim û cîgirê wî Kerîm Behrî, Ebdurahman Alî Kurde û Kardo M.Pîrdawîd ve hatin pêşwazî kirin.
Di hevdîtinê de rewşa li çar parçeyên Kurdistanê, encama hilbijartinên Iraqê û pêşbîniyên avakirina Hikûmeta nû ya Iraqê hatin gotûbêjkirin.
Li gel nirxandina rewşa giştî, mijareke din a sereke ya hate gotûbêjkirin jî pirsgirêkên welatparêzên ji Bakurê Kurdistanê li Hewlêrê dijîn, ne dayîna îqame ji bo xelkê Bakur jî hatin nîqaşkirin.
Yekîtiya Parlementeran jî diyar kirin ewê rewşa welatiyên ji Bakurê Kurdistanê bişopînin û ji bo çareseriyê jî hewl bidin.
Nûnertiya HDP’ê ragihand hevdîtin di atmosfereke erênî de derbas bûye.
(bz)
