کەنەکە: دەبێت لەسەر کۆمەڵکوژی دێرسیم لێپرسینەوە لە دوژمن بکرێت

ناوەندی هەواڵەکان

کەنەکە بە بۆنەی ساڵڕۆژی کۆمەڵکووژی دێرسیم بەیاننامەیەكی بڵاوکردەوە و ڕایگەیاند، دەبێت ڕێگە نەدەین تێکۆشانمان سست و لاواز بێت، دەبێت لەسەر کۆمەڵکووژی دێرسیم لێپرسینەوە لە دوژمن بکرێت.

کۆنسەی بەڕێوەبەری کۆنگرەی نەتەوەیی کوردستان- کەنەکە، بە بۆنەی ساڵیادی کۆمەڵکووژی دێرسیم، کە بە بڕیاری فەرمی دەوڵەتى تورک لە ٤ـی ئایاری ١٩٣٧ ئەنجامدرا ، بەیاننامەیەکی بڵاوکردەوە.

کەنەکە لە بەیاننامەیەکیدا ڕایگەیاندووە، ٨٧ ساڵ لەمەوبەر، گەلی کورد لە دێرسیم لە حەوت مانگانەوە تا ٧٠ ساڵان کۆمەڵکووژ کران، کۆمەڵکووژییەکی دڕندانە، هێرشێکی پاکتاوکاری بەسەر دێرسیم و دێرسیمیەکاندا ئەنجامدرا، بە بڕیاری فەرمی دەوڵەتى تورک، هێرشێکی سەربازی بەرفراوان بە ئامانجی لەناوبردنی گەلی دێرسیم ئەنجامدرا، هەزاران کەسیان لە دێرسم کۆمەڵکووژ و بریندار کرد و بە هەزاران کەسیان ناچار کرد کۆچ بکەن و دەربەدەریان کرد.

هەر لە بەیاننامەکەدا ئاماژەی بەوەشکرد، جگە لە کۆمەڵکووژی و برینداربوون و کۆچبەرکردنی بنەماڵەیی، ناوی دەرسیم بە یاسایەکی تایبەت گۆڕدرا بۆ تونجلی، ئەو بڕیاری کۆمەڵکووژییە، ئەو سیاسەتە دوژمنکارییە، تا ئەمڕۆش بەردەوامە، دڵی گەلی کورد بە هۆی ئەو کۆمەڵکووژییە گەورەیەوە سووتا و قەد لەبیر ناچێتەوە، کورد هەم وەک کردەوە و هەم ئەنجامدەرانی ئەو ڕووداوە دەبێت لەبیری نەکات.

کەنەکە ڕاشی گەیاندووە، لە ٤ـی ئایاردا، ئەم کۆمەڵکووژییە بە بیر دەهێنینەوە و دوای ٨٧ ساڵ بە هەموو هێزی مانەوە دیسان شەرمەزاری دەکەین، گرنگ نییە بەرپرسانی دەوڵەت و حکومەتی خوێنڕێژ چی ئەڵێن، دەرئەنجامی سیاسەتی گشتی چییە هیچ جیاوازیەک نییە و ئەم دڕندەییەی کە بەرامبەر گەلەکەمان دەکرێت لاپەڕەیەکی ڕەشە لە مێژووی خوێناوی دەوڵەت و حکومەتی تورکیادا.

هەروەها ئاماژە بەوەکراوە، ئێمە لە یادکردنەوەی ئەم کۆمەڵکووژییەدا ئەم ڕۆژە پڕ ئێش و ئازارانەدا، گەلەکەمان، ڕێبەر، پێشەنگ و تێکۆشەرانی بزووتنەوەی نەتەوەیی گەلەکەی، لە یادەوەرییەکانیدا بە ڕوونی و حورمەتەوە دەهێڵینەوە و لەسەر پرسی ئەم کۆمەڵکووژییە لێپرسینەوە لە دوژمن دەکەین و ڕێگە نادەین تێکۆشانیان لاواز بێت.

لە کۆتایشدا کەنەکە وتویەتى، دەبێت لە سەر کۆمەڵکووژی دێرسیم لێپرسینەوە لە دوژمن بکرێت، کۆمەڵکووژی دێرسیم لەبیرناکرێت و نابێت لەبیر بکرێت.

ب. ق