دۆخی ژنانی عێراقی لە نێوان توندوتیژیی و ئاڵەنگارییە یاساییەکان تاوتوێ دەکرێت

سلێمانی

لەژێر ناونیشانی (ژنانی عێراق لەنێوان توندوتیژیی و ئاڵەنگارییە سیاسییەکاندا)، کۆنفرانسێک بەڕێوە دەچێت و لەچوارچێوەی چەند پانێڵێکدا ڕەوشی ژنان تاوتوێ دەکرێت.

ئەمڕۆ لە هۆتێل شاری جوان لە سلێمانی، “کۆمەڵەی ژنانی عێراق لقی بەریتانیا” یەکەمین کۆنفرانسی خۆی بە ناونیشانی (ژنانی عێراق لە نێوان توندوتیژیی و ئاڵەنگارییە یاساییەکان) دەستی پێکرد، کە کەسانی یاسایی و داکۆکیکار لە مافەکانی ژنان و سەرجەم پێکهاتەکانی عێراق تێیدا بەشدارن و لە ماوەی دوو ڕۆژدا ڕەوشی ژنانی عێراق تاوتوێ دەکەن و دەرئەنجامەکان دەکەنە ڕاسپاردەیەک بۆ لایەنە پەیوەندییدارەکان.

لە یەکەم ڕۆژی کۆنفرانسەکەدا دوو پانێڵ بەڕێوەچوو، کە لە پانێڵی یەکەمدا تاوتوێی یاساکانی پەیوەست بە ژنان کرا و لە پانێڵی دووەمیشدا تیشکخرایە سەر دۆخی ژنانی ڕەنجدەر لە یاسا و سەندیکاکانی عێراقدا.

ئامانجمان هۆشیارکردنەوەی ژنانە بەرامبەر یاساکان و فشار درووستکردن بۆ جێبەجێکردنی یاسا

دونیا ڕامز، کە ڕێکخەری کۆنفرانسەکەیە لە لێدوانێکیدا ئامانجی کۆنفرانسەکەی بۆ ڕۆژنیوز ڕوونکردەوە و وتی: ئامانجمان هۆشیارکردنەوەی ژنانە بەرامبەر یاساکان و فشار درووستکردن بۆ جێبەجێکردنی یاسا، هاوکات بەراوردکردنی یاسا بەرکارەکانی هەرێم بە عێراق، هەروەها دەستنیشانکردنی لایەنە ئەرێنی و نەرێنییەکانی هەردووکیان.

تا ژنان هۆشیار و ئازاد نەبن و مافەکانیان مسۆگەر نەبێت ئەوا کۆمەڵگە کەموکورتە

لای خۆشییەوە خەدیجە محەممەد سکرتێری کۆمەڵەی ئافرەتانی کوردستان وتی: تا ژنان هۆشیار و ئازاد نەبن و مافەکانیان مسۆگەر نەبێت، ئەوا کۆمەڵگە کەموکورتە، بۆیە پێویستە کار بکرێت بۆ بڵاوکردنەوەی هۆشیارکردنەوەی یاسایی و جێبەجێکردنی دەقە یاساییەکان.

ش. ئـ