دەوڵەتی تورک بۆردوومانی ناوچە کشتوکاڵییەکانی کۆبانێی کرد

ناوەندی هەواڵەکان

کەمێک پێش ئێستا، دەوڵەتی داگیرکەری تورک بە فڕۆکەی خۆکوژ و تۆپهاوێژ بۆردوومانی ناوچە کشتوکاڵییەکانی ڕۆژهەڵاتی کۆبانێ کرد و بە هۆیەوە ئاگر لە ناوچەکە کەوتەوە.

جارێکی دیکە دەوڵەتی داگیرکەری تورک، دەستی بە بۆردوومانکردنی گوند و ناوچە کشتوکاڵییەکانی سنووری کۆبانێ لە ڕۆژئاوای کوردستان کرد.

بەپێی سەرچاوە هەرێمییەکان، دەوڵەتی داگیرکەری تورک، کەمێک پێش ئێستا بە فڕۆکەی خۆکوژ هێرشی کردە سەر ناوچە کشتوکاڵییەکانی نێوان گوندەکانی کوتلەپ و بەخدیکی ڕۆژهەڵاتی کۆبانێ.

هەروەها، دوای بۆردوومانەکە، ئەو دەوڵەتە داگیرکەرە بە تۆپهاوێژیش تۆپبارانی ناوچەکەی کرد.

زانراوە بەهۆی بۆردوومانەکەوە، ئاگر لە زەوییە کشتوكاڵییەکانی سنوورەکە کەوتووەتەوە و تا ئێستا زیانەکانی بۆردوومانەکە نەزاندراوە.

دەوڵەتی داگیرکەری تورک بە بەرچاوی هەموو جیهانەوە بەردەوامە لە هێرشەکانی بۆسەر ناوچە جیاوازەکانی ڕۆژئاوا و باشووری کوردستان و هاوڵاتییانی مەدەنی بە ئامانج دەگرێت و تا ئێستا لە ئاستی نێودەوڵەتیی و ناوخۆییدا هیچ ڕێگرییەک لەو پێشێلکارییانەی نەکراوە.

ب. جـ