وەزارەتی دارایی لەبارەی مووچەی چەند وەزارەتێکەوە ڕوونکردنەوەیەکی بڵاو کردەوە

ناوەندی هەواڵەکان

ئەمڕۆ وەزارەتی دارایی و ئابووریی هەرێم خشتەی مووچەی مانگی شووباتی بڵاو کردەوە، بەڵام وەزارەتی پێشمەرگە و دەزگا ئەمنییەکان و چەند شوێنێکی تری تێدا نەبوو، بەگوێرەی ڕوونکردنەوەیەک دەکەوێتە هەفتەی داهاتوو.

وەزارەتی دارایی و ئابووریی هەرێمی کوردستان، ڕوونکردنەوەیەکی سەبارەت بە مووچەی مانگی شوباتی هێزەکانی پێشمەرگەو دەزگا ئەمنییەکان و هەموو ئەو شوێنانەی ناویان لە لیستی مووچەی ڕۆژی ٢٨ ئەم مانگەدا نەهاتبوو، بڵاو کردەوە.

بەگوێرەی ڕوونکردنەوەکەی وەزارەتی دارایی و ئابووریی هەرێمی کوردستان، مووچەی مانگی شووباتی هێزەکانی پێشمەرگە و دەزگا ئەمنییەکان و هەموو ئەو شوێنانەی ناویان لە لیستی مووچەی ڕۆژی ٢٨ ئەم مانگەدا نەهاتبوو، لە نزیکترین کاتدا خشتەی مووچەکانیان بڵاو دەکەنەوە و لە هەفتەی داهاتوودا مووچەی مانگی شوباتی سەرجەم مووچەخۆران و فەرمانبەران دابەش دەکرێت.

ئەمە لە کاتێکدایە، پێشتر تەیف سامی لەبارەی نە ناردنی پارەی وەزارەتی پێشمەرگە و هێزە چەکدارەکانی هەرێمەوە ڕایگەیاندبوو، تا ئێستا حکومەتی هەرێم تەنها ژمارەی بۆ ئێمە ناردووە و لیستێکی ڕێکوپێک بە دەستمان نەگەیشتووە بۆیە ناتوانین پارەیان بۆ بنێرین.

ب.گ