ژنانی مەخموور ئیدانەی دەستدرێژیی ئەفسەرە تورکەکەیان کرد

مەخموور

ئەنجوومەنی عشتاری کامپی پەنابەرانی مەخموور، بە کۆنگرەیەکی ڕۆژنامەوانیی دەستدرێژیی و گێچەڵی ئەفسەرە تورکەکەیان لە شرناخ بۆ سەر ژنێک شەرمەزار کرد و ڕایانگەیاند،  ئەو هێرشە بۆ سەر تەواوی گەلی کورد و ژنانی کوردە.

لە شەقامی دیجلەی شاری شرناخ لە باکووری کوردستان، ئەفسەرێکی دەوڵەتی داگیرکەری تورک گێچەڵی بە ژنێکی کورد کرد و هەوڵیدا دەستدرێژیی بکاتە سەر،  لە دژی ئەم هێرشە ڕەگەزییە، ئەنجوومەنی عشتاری کامپی پەنابەرانی شەهید ڕۆستەم جودی لە مەخموور، کۆنگرەیەکی ڕۆژنامەوانییان ئەنجامدا و پشتیوانی خۆیان بۆ خەڵکی شرناخ دەربڕی.

مامۆستا بێریڤان ئیشلەک لە کۆنگرە ڕۆژنامەوانییەکەدا قسەی کرد و وتی:  ئەو هێرشە تەنها بەرامبەر ئەو ژنە نەکراوە بەڵکو بەرامبەر تەواوی گەلی کورد و ژنانی کورد کراوە، لەبەرامبەردا ئیرادە و هەڵوێست و بەرگریی خەڵکی شرناخ لەبەرامبەر تەواوی هێزە دەستدرێژیکار و هێرشکەرەکانە، دەوڵەتی داگیرکەری تورک لە پاش ئەوەی زانی ناتوانێت ئیرادە و هێزی گەلی شرناخ بشکێنێت، بۆیە هەوڵ دەدات لە ڕێگای گێچەڵ و دەستدرێژیی و هێنانی جەندرمە و سەرباز و سیخووڕ کەلتووری سیخووڕیکردن پێشبخات و بە بڵاوکردنەوەی ماددەی هۆشبەر ئیرادەی گەل بشکێنێت و بە شەڕی تایبەت کۆمەڵگا لەناوبەرێت، بە هەموو هێز و توانای خۆیان هەوڵی لەناوبردنی گەلی بۆتان دەدەن.

ئاماژەی بەوەشدا، ئێمەش وەکو ژنانی کورد، ئەم هێرش و گێچەڵ و دەستدرێژییە بە توندی شەرمەزار دەکەین و بانگ لە هەموو ژنان دەکەین بە درووشمی ” ژن ژیان ئازادیی” هەستنە سەر پێ، چونکە ئەم هێرشە ئەمڕۆ لە شرناخە سبەی لە شارەکانی تری کوردستان دووبارە دەبێتەوە، ئێمەش بە هەموو شێوەیەک پشتیوانی لە گەلی خۆمان لە شرناخ دەکەین.

ب.گ