شەممە, 8 سبت 2018 – 10:36 ڕۆژنیوز- كەركوک
لەماوەی ڕابردوودا، دەوڵەتی تورک هێزێکی چەکداری بۆ توركمانەكانی شاری كەركوک دروستکرد و لەڕووی ماددیی و لۆجستییەوە هاوکارییان دەکات.
ئەو هێزە چەکدارە کە لەژێر ناوی پاراستنی توركمانەكانی كەركوك دروستكراوە، ژمارەیان نزیكەی٦٠٠ چەكدار دەبێت و سەرجەمیان لە تورکیا ڕاهێنانی سەربازییان پێکراوە.
بەگوێرەی ئەو بەدواداچوونانەی، کە ڕۆژنیوز كردوویەتی، لە ئێستادا بۆ شاردنەوەی ئەو هێزە، بەرەی توركمانیی سەرجەم چەکدارەکانی كردووە بەناوی كۆمپانیایەكی بواری ئەمنی(سكورتی) و ئەركی پاراستنی بارەگاكانی بەرەی توركمانیان پێسپێدراوە.
بەپێی یاسای كۆمپانیا ئەمنییەكان، پێویستە جلوبەرگی كارمەندی كۆمپانیا ئەمنییەكان لە جلوبەرگی سوپا و هێزە ئەمنییەكان جیاوازبێت، بەڵام ئەو هێزە هەمان جلوبەرگی سەربازیی هێزە ئەمنییەكانی عێراق بەكاردەهێنن.
چاودێرێكی سیاسیش دروستكردنی ئەو هێزە بە هۆكارێك دەزانێت بۆ تێکدانی پێكەوەژیانی نێوان نەتەوەكانی شاری کەرکوک.
هەڤاڵ دارا، ئەو جاودێرە سیاسییەیە و بۆ ڕۆژنیوز وتی: دروستكردنی هەر هێزێكی سەربازیی بۆ هەر نەتەوەیەكی كەركوكیاخود هەر ئاینزایەكی شارەكە، كاریگەری خراپی دەبێت، وەك دەزنین لە دوای ڕووداوەكانی١٦ی ئۆكتۆبەرەوە دۆخی گەرم لە كەركوك هەیە، هەر پێكهاتەیەك لە شارەكە دەوێت لەڕێگای چەكەوە ئامانجەكانی بەدەسبێنێت و حیسابات بكات.
بەوتەی ئەو چاودێرە سیاسییە، لەدوای ڕووداوەکانی ١٦ی ئۆکتۆبەرەوە، تورکیا دەیەوێت ژمارەو ناسنامەی خۆی لە کەرکوک بسەپێنێت بە دروستكردنی هێزی چەكدار لەڕێگای كۆمپانیای ئەمنییەوە،دەشڵێت: ئێستا ئەم جۆرە دیاردەیە هەیە، هەر وڵاتێك بیەوێت چەكدار بگوازێتەوە ئەوا سوود لە كۆمپانیا ئەمنییەكان وەردەگرن، ئەو كۆمپانیا ئەمنییانەش نزیكن لەو ڕوئیایەی كە خۆی دەیەوێت.
هەڤاڵ دارا، پێیوەایە، کە كەركوك پێویستی بە چەك نییە، بەڵکو پێویستی بە پێكەوەژیانە، دروستبوونی وەها هێزێك دەچێتە چوارچێوەی میلیشیاوە و كەركوكیش پێویستی بە میلیشیانییە.
پێشتر شوان داوی، ئەندامی خولی پێشووی ئەنجومەنی نوێنەرانی عێراق، بەڕۆژنیوزی ڕاگەیاندبوو، کە تورکمانەکان داوایان کردووە، ئەو هێزە دوای تەواوکردنی ڕاهێنانی سەربازیی لە تورکیا، ببن بە بەشێك لە هێزەكانی حەشدی توركمانیی.
ب.ل
