شەممە, 8 سبت 2018 – 18:00 ڕۆژنیوز – هەولێر
ئێوارەی ئەمڕۆ، ژمارەیەک لە چالاکوانان و ڕۆژنامەنووسانی شاری هەولێر، بۆ ئیدانەکردنی هێرشە موشەکییەکەی ئێران بۆ سەر بارەگاکانی حزبی دیموکراتی کوردستانی ئێران (حدکا) و حزبی دیموکراتی کوردستان (حدک) لە شاری کۆیە و لەسێدارەدانی هەریەکە لە ڕامین حسێن پەناهی و زانیار و لوقمان مورادی، زیندانیانی سیاسیی کورد گردبوونەوەیەکیان لەبەردەم پارکی شانەدەر ئەنجامدا.
لە گردبوونەوەکەدا، بە بەرزکردنەوەی پانکارد و وێنەی ڕامین حسێن پەناهی، ئیدانەی هێرشە موشەکییەکەی ئێران بۆ سەر بارەگاکانی حزبی دیموکراتی کوردستانی ئێران (حدکا) و حزبی دیموکراتی کوردستان (حدک) لە شاری کۆیە و لەسێدارەدانی هەریەکە لە ڕامین حسێن پەناهی و زانیار و لوقمان مورادی، زیندانیانی سیاسیی کورد کرا.
لە کۆنگرەیەکی ڕۆژنامەنووسییشدا، عەلی مەحمود، چالاکوانانی مەدەنی و یەکێک لە ڕێکخەرانی چالاکییەکە قسەیکرد و وتی: دوای لەسێدارەدانی سێ چالاکوانی ڕۆژهاڵاتی کوردستان و موشەکبارانکردنی بارەگاکانی حدک و حدکا لە کۆیە، دەبێت کۆنسوڵخانەی ئێران لە هەولێر دابخرێت.
ئەو چالاکوانە داواشی لە حکومەتی هەرێم کرد، کە لەبەرامبەر لەسێدارەدانی ئەو زیندانییە سیاسییانە و هێرشەکەی هەولێر، هەڵوێستی جددی هەبێت، دەشڵێت:”ئەوەی ئەمڕۆ ئێران کردی تیرۆرێکی گەورەیە و تەنانەت ئەو چەکانەی ئەمڕۆ بەکارهێندراوە لە شەڕی داعش-دا بەکارنەهێندراوە”.
ب.ل
