دووشەممە, 2 يول 2018 – 07:45 ڕۆژنیوز – بڕیار محەمەد
سوپای تورک بەردەوامە لە داگیرکارییەکانی لە خاکی هەرێمی کوردستاندا، لە بەرامبەردا تا ئێستا پەرلەمانی هەرێم و حکومەتی هەرێم بێدەنگییان هەڵبژاردووەو هیچ هەڵوێستێکیان نەبووە، هاوکات لایەنە سیاسییەکانیش هەڵوێستێکی کردارییان نەبووە، دەربارەی هەڵوێستی یەکێتی و کارەکانی ئەوان لەو چوارچێوەیەدا، سەعدی ئەحمەد پیرە، وتەبێژی فەرمی یەکێتی نیشتیمانی کوردستان بۆ ڕۆژنیوز دەدوێت.
سەعدی ئەحمەد پیرە وتی:”حکومەتی عێراق هەرکاتێک بەرژەوەندی هەبوو دەڵێت سنوورەکانی عێراق هەموو یەکن، بەڵام کە بەرژەوەندی نەبوو بێدەنگ دەبێت، ئێمە ناڵێین خاکی خۆمان ناپارێزین و بەڵکو ئەرکی خۆمانە بیپارێزین، بەڵام دەبێت حکومەتی عێراقیش کاتێک هەرێم تۆمەتبار دەکات بە جیابوونەوە و پێشێلکردنی دەستوور، خۆشی بەپێی دەستوور هەموو سنوورەکان بپارێزێت و پاراستن و نەپاراستنی سنوور لەگەڵ هەرێمدا یەکلا بکاتەوە، ئێستاش سوپای تورکیا هاتووەتە خاکی کوردستانەوە، ئەوە لاوازیی حکومەتی ناوەند پیشان دەدات.
دەربارەی هەڵوێستی حزبەکەیان لەسەرد داگیرکارییەکانی تورکیا، وتەبێژی یەکێتی وتی، کە یەکێتی گرنگی زۆر بە پرسی هاتنە ناوەوەی سوپای تورکیا دەدات و، وتیشی:”ئێمە خاكی خۆمان خۆشدەوێت، چونكە نابێت كەسیتر هەبێت لە ئێمە زیاتر خاكەكەی خۆشبوێت، بۆیە یەكڕیزی و یەکدەنگی لایەنە سیاسییەكانی باشوری كوردستان لەم كاتەدا زۆر بە پێویست دەزانین”.
سەعدی ئەحمەد پیرە باسی لە سیاسەتی حزبەکەشی کرد و، وتی: لە پەیوەندییەکانمان و هەموو چاوپێکەوتن و هەڵوێستەکانماندا بۆ پارێزگاریی کردن لە هەرێمی کوردستان و پشتیوانیکردنی خەباتی گەلەکەمان لە باکور و ڕۆژئاوای کوردستان کارمان کردووەو بەردەوامیش دەبین.
https://youtube.com/watch?v=K_WDPG8gn28&feature=youtu.be
س.ح
