چوؤرشەممە, 15 أغس 2018 – 17:28 ڕۆژنیوز ـ سلێمانی
ئێوارەی ئەمڕۆ لە شاری سلێمانی، نوێنەرایەتی پادێ لێدوانێكی لەسەر هێرشی سەر تل عزێر و سیبا شێخ خدرێ و كۆمەڵكوژیی كۆچۆ لە ١٤ی ئابی ٢٠١٧ و ١٥ی ئابی ٢٠١٤ ڕاگەیاند.
شێخ جەمال، نوێنەری پارتی ئازادی و دیموكراسی ئێزدی – پادێ لە سلێمانی لێدوانەكەی خوێندەوە، كە تێیدا هاتبوو: هەموو شەهیدەكانی هێرشی سەر تل عزێر و سیبا شێخ خدرێ و كۆمەڵكوژیی كۆچۆ لە ١٤ی ئابی ٢٠١٧ و ١٥ی ئابی ٢٠١٤ بیردێنینەوە و سەرەخۆشی لە كەسوكاریان و گەلی كورد دەكەین، لەبەرئەوەی ڕۆژی ١٥ی ئاب ڕۆژی سەرهەڵدان بوو، ڕۆژی ئازادیی گەلی ئێزدی و هەموو گەلان بوو، لەبەرئەوە نەوەكانی عوسمانی ویستیان ئەو ڕۆژە بكەنە ڕۆژێك بۆ قڕكردنی گەلی ئێزدی.
ئەوەش هاتبوو: نزیكەی ٢٠٠ ساڵە بە دەستی عوسمانی و هاوكارەكانی، ئەو فەرمانانە لەسەر ئێمە بەڕێوەدەبەن.
ئاماژە بۆ ئەوەش كرا: پێویستە ئێمە بەرامبەر ئەو هێرشانە یەكگرتوو بین و پێكەوە بین، هەتا یەكنەگرین ئەو هێرشانە بەردەوام دەبن، هەتا ئێستاش هێرشەكان بەردەوامن.
هەروەها ئەوەش خرایەڕوو: پێویستە ئەو فەرمانانە وەك جینۆساید بناسرێن، بانگی ئێمە بۆ هەموو كۆمەڵگەی ئازادیخوازە، كە پشتگیری گەلی ئێزدی بكەن و فەرمانەكانی سەر ئێزدییەكان ببینن.
لە كۆتایشدا ڕاگەیەندرا: هەروەها هێرشكارەكانیش دەبێت بزانن، كە گەلی ئێزدی بە هێرش و كۆمەڵكوژیی لەناوناچێت، ئێمە تێكۆشانی خۆمان بەردەوام دەكەین، بانگەوازیش بۆ ئێزدییەكان دەكەین كە بگەڕێنەوە سەر خاكی پیرۆزی خۆیان.
ك.ك
