چوؤرشەممە, 5 سبت 2018 – 18:30 ڕۆژنیوز – ناوەندی هەواڵەکان
ئەمڕۆ بە سەرپەرەشتی کۆسرەت ڕەسوڵ جێگری سکرتێری گشتی یەکێتی، ئەنجومەنی سەرکردایەتی یەکێتی نیشتیمانی کوردستان لە شاری سلێمانی کۆبووەوە، دوای کۆبوونەوەکە و کەمێک لەمەوبەر، راگەیەندراوێکیان بڵاوکردەوە.
یەکێتی دەربارەی پێکهێنانی حکومەتی نوێی عێراق و پێشهاتە سیاسییەکان ڕایگەیاندووە:”وادەی دانیشتنی پەرلەمانی عێراق ١٥ی ئەیلولە،لە ئێستاوە هەتا ئەو كاتە، كات بە دەستی سەركردایەتی سیاسی كوردستانەوە هەیە، چاودێری سیاسەتی جیهانی و ناوچەیی و ناوخۆیی عێراق بكات، چاوەروان بین وەڵامی رەسمی پرۆژە هاوبەشەكەی یەكێتی و پارتی لەلایەن لایەنەكانی عێراقەوە بدرێتەوە، هەتا بزانرێ، چ لایەنێك، بە ڕاستی ئامادەیە كێشە ئابوری و سیاسی و دەستوورییەكانی عێراق و مافەكانی گەلی كوردستان چارەسەر بكات، بەمەش بەرچاومان ڕوون دەبێتەوە بۆ دوابڕیاردان لەسەر ئەم پرسە چارەنوسازە”.
لەسەر پەیوەندییەکانیان لەگەڵ پارتیدا، یەکێتی ڕایگەیاند: لە کۆبوونەوەدا جەخت كرایەوە كە، پەیوەندی هاوسەنگی یەكێتی و پارتی و پرۆژە هاوبەشەكەی نێوانیان گرنگە و زۆر گرنگیشە هەوڵبدرێ پەرە پێبدرێ بۆ ئەوەی لایەنە كوردستانیەكان بگرێتەوەو پرۆژەكەش دەوڵەمەند بكرێ.
سەبارەت بە هەڵبژاردنی كوردستانیش ڕاگەیەندراوە:”یەكێتی بڕیارو سیاسەتی دیموكراسی ئەوەیە، هەڵبژاردن لەكاتی خۆیدا و دوور لە گومان و نیگەرانییەكان ئەنجامبدرێ، بۆ ئەنجامدانیشی تەواوی ئامادەكاریەكانی سازداوە”.
ئەوەشیان راگەیاندووە:”ئاشكراشە هەڵبژاردن بۆ حیزب و لیستەكانە، ئەگەر زۆربەی لایەنە سیاسییەكان لە ڕێی كۆمسیۆنەوە پەیامی ڕوونی خۆیان بگەیەننە سەرۆكایەتی حكومەت و بە ڕەسمی پەیامەكە بگەیەنرێتە پەرلەمان و پەسەندی دواخستنی هەڵبژاردن بكرێت، یەكێتیی نیشتمانیی كوردستانیش، پەسەندی دەكات”.
لەکۆتاییدا یەکێتی ڕایگەیاندووە:”ئومێدەواریشین هەموولایەك پێگە و ڕێگەی گەلەكەمان لە عێراق و كوردستان و ناوچەكەدا وەك خۆی بخوێننەوە، كورد چەند پێویستی بە پشتیوانی نێودەوڵەتییە، ئەوەندەش پێویستی بە دۆستایەتی ئیقلمیە، بۆیە یەكێتیی نیشتمانیی كوردستان سورە لەسەر ئەم خالانە::
–سیاسەتی هاوسەنگی لە ناوچەكە و عێراقدا.
–یەكریزی هێزە كوردستانییەكان لە كوردستاندا.
–جێبەجێكردنی تەواوی ماددە و بڕگەكانی دەستور، دوور لە روانگەی تایفەگەری و هێشتنەوەی حكومەتی عەسكەری لە ناوچە كێشە لەسەرەكان.
–هێزی پێشمەرگە و ئاسایش و پۆلیسی كوردستان، بە هاوبەشی لەگەڵ پۆلیسی ئیتحادی، بەرپرسیارێتی ئاسایشی ناوچە كێشە لەسەرەكانیان پێ بسپێردرێت.
–ئەنجومەنی پارێزگای كەركوك بە زووترین كات كۆببنەوەو ئەركە یاساییەكانی دوا هەڵبژاردن ئەنجامبدات.
–چارەسەری ریشەیی بودجە و موچە و نەوت‌و گاز.
س.ح
