شەممە, 16 يون 2018 – 14:38 ڕۆژنیوز- دهۆك
هەڕەشە وهێرشە داگیركارییەكانی دەوڵەتی تورك بۆ سەر خاكی كوردستان و بە تایبەت هەڕەشەكردنیان بۆ سەر قەندیل بەردەوامیی هەیە و هاوڵاتیانی پارێزگای دهۆك-یش لەو بارەیەوە بۆ ڕۆژنیوز قسەیان كرد.
بێوار ڕەشید، ڕۆژنامەنووس، پێوایە گرفتی سەرەکیی کورد دوورکەوتنەوەیەتی لەیەکتر و ئەمە وایکردووە، کە دووژمن خۆی زاڵ کات، وتیشی:هەر لێكنزیكبوونەوە و ڕێکكەوتنێك لەنێوان هێز و لایەنەسیاسییەكاندا بكرێت كاریگەرییەكی سەرەكیی دەبێت لەسەر دۆخی کورد، بە تایبەت ئەمڕۆ ڕۆژهەڵاتی ناوەڕاست بە دۆخێكی دژواردا تێپەڕ دەبێت، بۆیە بەستنی كۆنگرەی نەتەوەیی لەم ڕەوشەدا زۆر پێویستە.
بێوار، وتیشی: قۆناغەکە هەستیارە و دووژمنی گەلی كورد زۆرە، ڕۆژ لەدوای ڕۆژ پیلانی جۆراوجۆر دادەنێن، باشوری كوردستان جگە لەو مەترسیانە كێشەی ئابووریی و سیاسیشی هەیە، بۆیە دەبێت رێگری بكرێت لە زیاتربوونی مەترسییەكان و ببین بە یەك.
هەروەها، یاسین سەلازی هونەرمەند، وتی: بەستنی كۆنگرەی نەتەوەیی بە تەنیا داواكاری تاكێك نییە و هەموومان خوازیاری ئەو یەکگرتنەین لەدژی داگیركارییەكان، بۆیە بۆ چارەسەری گرفتەكان و تێپەڕاندنی مەترسییەكان و لەپێناو بەرژەوەندیی گشتییدا، لایەنەكان دەبێت یەكبگرن.
ش.ف
