یەكشەممە, 23 يول 2017 – 11:45
ڕۆژنیوز – جیهاد هەورامی
چالاكوانانی ژینگەیی لە پارێزگای هەڵەبجە بەستنی كۆنگرەی نەتەوەیی بۆ پێكهێنانی یەكێتی كوردان بەگرنگ دەزان بۆ پاراستنی ژینگەو پێیانوایە، نەبونی یەكێتی و یەكڕیزی كوردان وایكردووە ئەو كێشانە نەكرێنە یاسایی و نێودەوڵەتی بۆ ڕێگریكردن لەپێشێلكاری وڵاتانی داگیركەر.
کۆنگرەی نەتەوەیی کوردستان- کەنەکە، بەردەوامە لە هەوڵەکانی بۆ ئامادەکاریی بۆ بەستنی کۆنگرەی نەتەوەیی و بۆ یەکڕیزی گەلی کورد، بۆ ئەم مەبەستەش لە ١٥ و ١٦ی ئەم مانگەدا کۆبونەوەی ڕاوێژی نەتەوەیی بە بەشداری نوێنەرانی لایەنە سیاسییەکانی هەرچوار پارچەی کوردستان، لە سلێمانی بەڕیوەچوو، لە ئێستاشدا سەرجەم چین و توێژە جیاوازەکان پشتیوانی خۆیان بۆ کۆنگرەی نەتەوەیی دەردەبڕن.
هاوسەر هەورامی، بەرپرسی كۆمەڵەی كوردستانێكی سەوز لە هەڵەبجە، بە ڕۆژنیوزی وت:”پرسی پێكهێنانی یەكێتی نەتەوەیی بۆ هەر چوار پارچەی كوردستان پرسێكی گرنگ و هەنوكەییە لە هەموو بوارەكاندا، بە تایبەت بواری ژینگە و لەئەگەری پێكهێنانی ئەو یەكێتیەش بەكۆدەنگی و یەكگرتوویی هەموو لایەنەكان دەبێتە هۆی زیاتر پاراستنی ژینگەكەمان بەدەست دەوڵەتانی داگیركەری خاكەكەمان”.
هاوسەر، وتیشی:”گەلی ئێمە دوچاری كۆمەڵێك گرفتی ژینگەیی بووەتەوە لە ژێر دەسەڵاتی دەوڵەتانی داگیركەر، كە ڕۆژانە بەگرتنەوەی سەرچاوە ئاوییەكان و سوتاندنی دارستان و لەناوبردنی ژینگەكەكان دەیانەوێ فشارەكانیان بۆ سەر ئێمە زیاتر بكەن، بۆیە تەنها زامنی پاراستنی ئەو ژینگەیە و ڕووبەڕووبوونەوەی داگیركەران پێكهێنانی یەكێتی نەتەوەیی كوردە بۆ ئەوەی وەك كیانێكی سەربەخۆ و بەهێز ڕووبەڕوویان بوەستینەوەو ئەو فشارانە لەسەر خۆمان لابەرین”.
سارا سەلام، كچە چالاكوانێكی بواری ژینگەیە بۆ ڕۆژنیوز قسەیکرد وتی:”بەستنی كۆنگرەی نەتەوەیی و پێكهێنانی یەكێتی كوردان بەواتای ئاشتەوایی دێت بۆ سەرجەم لایەنە سیاسییەكان لە هەر چوار پارچەی كوردستان، كە بەداخەوە بەهۆی ئەو ئاڵۆزی و ململانێی لایەنە سیاسییەكان و هێرش و تۆپبارانی وڵاتانی داگیركەر بۆ سەر خاكی باشور و پارچەكانی تر ژینگەی ووڵاتمان بەرەو لەناوچوون دەچێت، بۆیە پێویستە لە پێكهێنانی ئەو یەكێتییە بەگرنگییەوە باس لە بواری ژینگە و پاراستنی بكرێت بۆ چارەسەركردنی ئەو كێشانە”.
سارا، ئاماژەی بەوەشدا:”بەهۆی تەبا نەبوونی ناوخۆیییەوە نەمانتوانیوە كۆدەنگی دروستبكەین و سیاسەتێكی تۆكمەمان هەبێت بەرامبەر بە دوژمنانمان، كە ڕۆژانە لەهەر پارچەیەكی كوردستان فشارو ڕێگریمان لێ دەكرێت، نەمانتوانیوە ئەو كێشانە بەیاسایی و بەنێودەوڵەتی بكەین، تاوەكو ڕێگری لەو هەمو پێشێل كاریانە بكەین و نەهێڵین ووڵاتانی داگیركەر بە ئارەزووی خۆیان ئاومان لێ بگرنەوەو ژینگەكەمان بسوتێنن، بۆیە پێكهێنانی یەكێتی كوردان دەبێتە هۆی چارەسەری ئەو هەموو گرفتانە و بەهێزكردنی سیاسەتی كورد”.
هەورامان سەجادی، چالاكوانێكی دیکەی بواری ژینگەیە و بەرپرسی ڕێكخراوی ژینگەپارێزی هەڵەبجەیە، لەو بارەیەوە بۆ ڕۆژنیوز دەڵێت:”وەكو چالاكوانانی بواری ژینگەیی داواكارین لەكۆنگرەی نەتەوەیی كوردان لەكاتی پێكهێنانی ئەو یەكێتیە بەگرنگیەوە باس لە پاراستنی ژینگەی هەر چوار پارچەی كوردستان بكات، چونكە داگیركەرەكان بە بەردەوامی بەرەنگاری ژینگەی ئێمە دەبنەوە بە سوتاندن و لە ناوبردنی، ئەوەتا ئێران هەمیشە هەوڵی گرتنەوەو وشككردنی سەرچاو ئاوییەكان دەدات”.
هەورامان سەجادی وتیشی:”كۆنگرەی نەتەوەیی كورد پێویستە بەجدی كار لەسەر ئەم پرسە بكات و تەواوی لایەنە سیاسییەكانیش ئەركی سەرشانیانە بۆ پێكهێنانی نەتەوەیی كوردان بەشداری بكەن، بە تایبەت پارتی كە بەداخەوە لە یەكەم هەنگاودا ئامادەنەبوو، پێویستە لە هەنگاوەكانی تر واز لە بەرژەوەندە حزبی و جێبەجێكردنی ئەجێندای وڵاتانی ئیقلیمی بەلاوە بنێت و بۆ بەهێزكردنی ئەو یەكێتییە بەشداربێت”.
س.ح
