“یەکنەگرتنی کورد دەستکەوتەکانی باشور و ڕۆژئاوا لەباردەبات”

داگیرکارییەکانی دەوڵەتی تورک و یەکدەنگ نەبوونی لایەنە کوردییەکان نیگەرانیی هاوڵاتیانی باشوری کوردستانی بەدوای خۆیدا هێناوە و هاوڵاتیانی شارۆچکەی ڕانیەی ناوەندی ئیدارەی ڕاپەڕین-یش لەوبارەیەوە بۆ ڕۆژنیوز دەدوێن.

عوسمان عەزیز، یەکێک لەو هاوڵاتیانەیە و ئاماژەی بۆ ئەوەکرد، کە بە سەدان ساڵە گەلی کورد لە سەر خاکی خۆی لە بەرامبەر بە داگیرکەران بەرخۆدان دەکات، ئەمڕۆ-ش تورکیا بە بەرچاوی هەموو جیهان پەلاماری کوردان دەدات و کەسیش دەنگی لێوە نایەت.

عوسمان، سەرنجی ڕاکێشایە سەر لێدوانەکەی نێچیرڤان بارزانیی، سەرۆکی حکومەتی ەهرێمی کوردستان، کە لەبەرامبەر داگیرکارییەکانی دەوڵەتی تورک-دا پەکەکەی تۆمەتبارکرد و بە “داگیرکەر”ناویبرد و وتی:”زۆر بە داخەوە بۆ سەرۆکی حکومەتی هەرێم کە بە هێزێکی کوردستانیی دەڵێت داگیرکەر، لەکاتێکدا لەکاتی هێرشی داعش گەریلاکانی هەپەگە وەک ئەرکێکی نەتەوەیی و ئەخلاقی شانبەشانی پێشمەرگە لە دژی داعش شەڕیان کرد، نابێت بیریشمان بچێت، کە مەسعود بارزانی لەوکاتەدا سەردانی مەخموری کرد و دەست خۆشی لە هێزەکانی گەریلا کرد بۆ پاراستنی باشوری کوردستان”.

ئیبراهیم عەلی، هاوڵاتییەکی دیکەیە و باسی لەوەکرد، کە بەدرێژایی مێژوو تورکیای فاشیست دژی دەستکەوتی کوردان وەستاوەتەوە، کەچی ئێستا پارتی بۆ بەرژەوەندیی ئابووریی خۆی چووەتە ژێر ڕکێفی دەوڵەتی تورکەوە.

ئیبراهیم، سەبارەت بە قسەکانی نێچیرڤان بارزانی، وتی: نابێت بەهۆی هەندێک بەرژەوەندیی لایەنەکانی سیاسیی لێدوانی لەم جۆرە بدەن، کە هیچ خزمەت بە هێڵی نەتەوەیی و یەکگرتوویی کوردان ناکات، دەبێت هەموو هێز و لایەنەکان سەبارەت بە داگیرکەرانی کوردستان یەک دەنگ بن، چونکە ئەگەر لەم هەلومەرجەدا کورد خاوەنی یەک وتاری نەتەوەیی نەبێت دەستکەوتی باشور و ڕۆژئاوای کوردستانیش لەبار دەچێت.

ش.ف/م