دووشەممە, 3 سبت 2018 – 16:17 ڕۆژنیوز – ناوەندی هەواڵەکان
ئەمڕۆ، ناوەندی ڕاگەیاندنی هێزەکانی پاراستنی گەل-هەپەگە، لەبارەی چالاکیی گەریلاکان لە باشوری کوردستان، ڕاگەیەندراوێکی بڵاوکردەوە.
بەگوێرەی ڕاگەیەندراوەکە: لەچوارچێوەی هەڵمەتی شۆڕشگێرانەی شەهید پیرۆز و شەهید ئاگریدا، گەریلاکانمان زنجیرەیەک چالاکییان ئەنجامدا، لەو چوارچێوەیەدا ڕۆژی ٣١ی ئاب گەریلاکان لە گردی لێلکانی ناوچەی برادۆست چالاکییان لەدژی سەربازانی سوپای تورک ئەنجامداوە، لەو چالاکییەدا ژمارەیەکی زۆر سەرباز کوژراون و بەڵام ژمارەیان نەزانراوە.
ئەوەش خراوەتەڕوو: ڕۆژی ٢ی ئەیلول بۆ جاری دووەم سەربازانی سوپای تورک بوونە ئامانجی چالاکیی گەریلاکانمان، لەچوار قۆڵەوە لە سەنگەرەکانی دوژمن درا، لەو چالاکییەشدا ژمارەی کوژراو و بریندارەکانی سوپای تورک نەزانرا.
هەر هەمان ڕۆژ هێزەکانی هەپەگە لە گردی شەهید مونزوری نزیک گردی خودای ناوچەی بارزان لە دژی سوپای تورک چالاکییان ئەنجامداوە و بە تووندی لە سەنگەرەکانی سوپای تورکیان داوە، ژمارەی کوژراو و بریندارەکانی ئەو چالاکییەش نەزانراوە.
هەر بەگوێرەی ڕاگەیەندراوەکەی هەپەگە، کاتژمێر ٠٣:٠٠ی بەرەبەیانی ئەمڕۆ فڕۆکە جەنگییەکانی سوپای تورک گوندی کەڤنی مژێ-ی سەر بە شارۆچکەی ئامێدییان لە پارێزگای دهۆک بۆردوومان کردووە.
ب.ل
