لەزینی وەرتێ گرژی لەنێوان پارتی و یەکێتی دروست دەبێت  

لە دوێنێوە لەزینی وەرتێ گرژی لەنێوان پارتی و یەکێتی درووست بووە، هەردوولا هێزی تایبەتیان ناردۆتە ناوچەکە و ڕووبەڕووی یەک وەستاون.


سەرچاوەیەک لەشارەدێی وەرتێی سەر بە پارێزگای هەولێر، بە ڕۆژنیوزی ڕاگەیاند، دوێنێ بازگەی ئاسایشی پارتی لەشارەدێی وەرتێ بە بیانووی قەدەغەی هاتووچۆ ڕێگەی بەخەڵکی شارەدێکە نەداوە کە نیشتەجێی ڕانیەن و ویستویانە بگەڕێنەوە ناو ڕەزو باخەکانیان.

سەرچاوەکە وتیشی: ئەو خەڵکەی وەرتێ کە لە ڕانیەوە دەچنەوە بۆ وەرتێ زۆرینەیان کەسایەتی دیاری وەرتێ و فەرماندە و بەرپرسی یەکێتین، بەوتەی خۆیان بە ئاسایشی بازگەکەیان وتووە ئەگەر بە نەرمی ڕێگەمان نەدەن بچینە ناو ڕەزو باخەکانمان بەهێز ڕێگای خۆمان دەکەینەوە.

هەمان سەرچاوە ئاماژەی بەوەشدا بۆ چارەسەری کێشەکە لیوای ٧ی پیادەی سۆران کە لیوایەکی هاوبەشی پارتی و یەکێتیە و سەر بەوەزارەتی پێشمەرگەیە لەسەر زینی وەرتێ جێگیرکران، وتیشی: لە ئێستادا ئەو هێزە هاوبەشەی پارتی و یەکێتی سەرقاڵی دروستکردنی بارەگای سەربازین لەسەر زینی وەرتێ.

زینی وەرتێ ناوچەیەکی ستراتیژی گرنگە، سنووری جیاکەرەوەی ئیدارەی ڕاپەڕین و ناحیەی وەرتێیە، زنجیرە چیای کارۆخ بە قەندیلەوە دەبەستێتەوە.

ک.س