​​​​​​​" پێویستە لە بەرامبەر هەژموونی فاشیستیانەی تورکیا یەکێتی نەتەوەیی بەرپا بکرێت"

مامۆستایانی زانکۆ و کەسایەتییەکانی سنوری ئیدارەی ڕاپەڕین ڕایدەگەیەنن، پێویستە لە بەرامبەر هەژموونی فاشیستیانەی تورکیا یەکێتی نەتەوەیی بەرپا بکرێت، ئاماژە بۆ ئەوەشدەکەن کە هەوڵە داگیرکارییەکانی دەوڵەتی تورک، زنجیرەیەکە لە کۆی هەوڵی فاشیزمی جیهانی، دەشڵین: ئەگەر لەم هەلومەرجەدا گەلی کورد و لایەنە سیاسییەکان رێکنەکەون لە داهاتوودا تووشی گرفتی گەورەتر دەبین.


مامۆستایانی زانکۆ و کەسایەتییەکانی شارۆچکەی ڕانیە-ی ناوەندی ئیدارەی ڕاپەڕین باس لە هەوڵی داگیرکاریی و فاشیستییانەی تورکیا دەکەن و داوای یەکگرتوویی دەکەن لە بەرامبەر دوژمنان.

لەو بارەیەوە ئارام قادر، مامۆستای زانکۆ، سەبارەت بە داگیرکارییەکانی تورک، بۆ سەر کورد و وڵاتانی دیکە پێیوایە: دەوڵەتی فاشیستی تورکیا بە درێژایی مێژوو هەوڵێکی ئیمپریالیانە و داگیرکاری هەبووە بەرامبەر بە خاک و نیشتمانی نەتەوەکانی دیکە و لە ناوخۆی تورکیاش هەمیشە هەوڵی داوە جیاوازییەکان نەهێڵێت و بە عەقڵیەتێکی فاشیستیانە ڕێبەرایەتی خەڵک بکات، "بۆیە ئەو عەقڵە فاشیستەی تورکیا هەمیشە لە جەنگدا دەژی و باوەڕی بە ئازادی و پێکەوە ژیان نییە، بۆیە هەمیشە وا دەبینێت کە نەتەوەکانی دیکە بۆ سەر ئەوان مەترسین و هەوڵی سڕینەوەیان دەدات".

ئەو مامۆستایەی زانکۆ زیاتر وتی: دەستدرێژییەکانی تورکیا نەک هەر لە ناوخۆی تورکیا و باکور و باشوری کوردستان بەڵکو درێژ دەبێتەوە بۆ وڵاتانی وەک سوریا و لیبیا، بەو جۆرەش دەیەوێت هەژموونی خۆی لە وڵاتانی دیکە جێبکاتەوە، بێگومان ئەو هەوڵە فاشیستەی تورکیا  زنجیرەیەکە لە کۆی هەموو ئەو هەوڵانەی کە لە فاشیزمی جیهانیدا بەدی دەکرێن، بۆیە دەوڵەتی فاشیستی تورکیا لەبەرئەوەی بەرهەمی جەنگە بۆیە هەمیشە لە قەیرانی قوڵدا دەژی و هەمیشە لەبەردەم هەڵوەشاندنەوەدایە و مەحکومە بەوەی کە بڕوخێت.

لە کۆتایی قسەکانیشیدا، وتی: گەلی کورد پێویستە لە بەرامبەر ئەو هەژموونە فاشیستیانەی تورکیا یەکێتی نەتەوەیی بەرپا بکات، گەل ڕێکخستنی خۆی هەبێت، ئەگەر حزبەکانیش نەیان کرد پێویستە خەڵک لە هەموو شارو شارۆچکەکان خۆیان بە ڕێکخستن بکەن و بازنەی یەکێتی نەتەوەیی دروست بکەن، ئەگەر لەو هەلومەرجەدا گەلی کورد و لایەنە سیاسییەکان ڕێکنەکەون بێگومان لە داهاتوودا تووشی گرفتی گەورەتردەبن.

هەر لەسەر ئەو مژارە و پەیوەست بە دروستبوونی یەکێتی نەتەوەیی و داگیرکاریی دەوڵەتی تورک، شۆڕش قادر، کەسایەتی سنوری ئیدارەی ڕاپەڕین ڕایگەیاند، "پەیامی ئێمە ئەوەیە پێویستە گەلی کورد لە هەر چوار پارچەی کوردستان بەرەو یەکگرتوویی هەنگاوبنێن، بەرنامەیەکی نیشتمانیان هەبێ سەبارەت بە دەست درێژییەکانی تورکیا بۆ سەر کوردستان، هەموومان دەزانین تورکیا هەموو هەوڵەکانی چڕ کردۆتەوە بۆ لەناوبردنی کورد، تا ئێستا تورکیا دانی بە هەرێمی کوردستان دانەناوە، هەرێمی کوردستان لە تورکیا نوێنەری هەیە تورکیا وەک حزب و لایەن مامەڵەیان لەگەڵدا دەکات نەک وەکو و حکومەتی هەرێمی کوردستان، تاکە دوژمنی سەرسەختی کورد تورکە، ئەو تورکەش بە سەرۆکایەتی ئیخوانەکانە کە ئەردۆغان سەرۆکایەتیان دەکات".

شۆڕش، دەشڵێت: پەلامارەکانی تورکیا بۆ سەر شوێنە جیاوازەکان ئەوەیە کە نیازی زیندووکردنەوەی خەلافەتی عوسمانی هەیە، بەڵام ئەو خەونەی بۆ ناچێتە سەر هەموو سیاسەتەکانی تورکیا لە ناوخۆ و دەرەوە و لە بواری ئابووری شکستیهێناوە و دەشبینین لە ئایندەیەکی نزیک چۆن تووشی شکست دەبێت لە بەرامبەر هەموو جیهان و بە تایبەتیش کورد، گەلی کورد لە باشور و بەتایبەت لە ڕۆژئاواش توانیان بەرپەرچی بێ وێنەی تورکیا بدەنەوە کە هەموو جیهان بێتە سەرخەت، بۆیە لە کۆتایدا دەڵێم با ئەردۆغان هیچی دیکە بە ناوی دینەوە پەلاماری گەلان نەدات، چونکە ئەردۆغانی دیکتاتۆر دژی مرۆڤایەتییە و لە کۆتایشدا شکستدێنیت.

ک.س