چوؤرشەممە, 1 أغس 2018 – 07:44 ڕۆژنیوز- محەمەد حەسەن
فڕۆکە جەنگییەکانی سوپای تورک سێ ساڵ لەمەوبەر بە بۆردوومانەکانیان هەشت هاوڵاتیان لە زارگەلی شەهید کرد، فڕۆکە جەنگییەکانی سوپای تورک تا ئێستاش بەردەوامن لە بۆردوومانی باشوری کوردستان، کەسوکاری ئەو شەهیدانە لەو بارەیەوە بۆ ڕۆژنیوز دەدوێن.
حەمەدەمین خدر، باوکی شەهیدێکی زارگەلی دەڵێت: ڕژێمی دیکتاتۆری تورکیا لەمێژە بۆردوومانی گەلی کورد دەکات، ئێمەی گەلی کورد لە باشوری کوردستان ڕاپەرینمان کرد بە زەحمەتی و قوربانیدان دژی ڕژێمی بەعس و لە کوردستان وەدەرماننا، ئێستاش تورکیا خەریکە خاکمان لێ داگیردەکات.
دەشڵێت: پەیاممان بۆ ڕێکخراوە جیهانییەکان هەیە، کە سنوورێک بۆ دەستدرێژییەکانی دەوڵەتی تورکیای فاشیست دابنێن، گەلی کورد قوربانی زۆری داوە، با بەس بێت ئێمەش دەمانەوێت وەک هەموو گەلانی جیهان بە ئازادیی بژین.
هەروەها ئەحمەد خدر، کەسوکاری شەهیدانی بۆردوومانی زارگەلی دەڵێت: هیوادارین کە گەلی کورد هیچیتر لە لایەن دەوڵەتانی داگیرکەری کوردستان بۆردوومان نەکرێت، ئێمەی گەلی کورد بە بۆردوومان و قوربانیدان لەناو ناچین و دەست لە خاک و وڵاتی خۆمان بەرنادەین.
ئەوەش دەڵێت: داوا لەلایەنی پەیوەندیدار و حکومەتی هەرێم و ڕێکخراوەکانی مافی مرۆڤ دەکەین، کە هەوڵی ڕاگرتنی بۆردوومانەکانی تورکیا بدەن و بۆ ئەوەی لە گوندەکانی خۆمان کشتوکاڵ و ئاژەڵداریی بکەین، دەبێت هەموومان هەوڵی یەکڕیزیی و تەبایی ناو ماڵی خۆمان بدەین.
بەرەبەیانی ڕۆژی ١ی ئابی ٢٠١٥، فڕۆکە جەنگیەکانی سوپای تورک وەک پیشەی هەمیشەییان، هێرشێکی دڕندانە و بێبەزییانەیان کردەسەر گوندەکانی بناری قەندیل، لە ئاکامی ئەو هێرشەدا هەشت کەس شەهید بوون و زیاتر لە ١٠ کەس برینداربوون.
لە یەکەم هێرشدا ماڵی هاوڵاتییەک بە ناوی مام خدر بە ئامانج گیرا، لەوێ پورە ئایشێ، هاوژینی مام خدر، شەهید بوو و چەند کەسێکی دیکەش برینداربوون، کاتێک خەڵک بەهانای بریندارەکانەوە چوون، جارێکی دیکە فڕۆکە تورکییەکان خەڵکە مەدەنیەکەیان بۆردومانیان کردەوە، لە ئەنجامدا حەوت کەسی دیکە شەهید بوون.
