چوؤرشەممە, 11 أبر 2018 – 14:32
ڕۆژنیوز – ناوەندی هەواڵەکان
کەسوکاری چوار شەهیدەکەی دۆڵی باڵەیان داوا لە لایەنە پەیوەندیدارەکانی هەرێم و بەغدا و نەتەوە یەکگرتووەکان لەسەر کۆمەڵکوژیی ڕۆڵەکانیان بێنە دەنگ و دەوڵەتی تورکیا و ئەردۆغان دادگایی بکەن.
بەرەبەیانی ڕۆژی ٢٢-٣، فڕۆکە جەنگییەکانی تورکیا گوندەکانی وەسان و سەرکان و ماونان-ی سەر بە شارەدێی قەسرێ-یان لە سنوری چۆمان لە دۆڵی باڵەیان-ی پارێزگای هەولێر بۆردوومانکرد، بەو هۆیەشەوە چوار هاوڵاتی شەهیدبوون، کە دوانیان پێشمەرگە بوون و بۆ پیرۆزکردنی ڕوویان لە ناوچەکە کردبوو، ئەمڕۆش کەسوکاری ئەو چوار شەهیدە بەیاننامەیەکیان بڵاوکردەوە.
لە بەیاننامەکەدا هاتووە: هێرشی فڕۆکە جەنگیەکانی تورکیا بە بەرچاوی کۆمەڵگەی نێودەوڵەتیی، ڕێکخراوەکانی مافی مرۆڤ و حکومەتی هەرێم و بەغدا، نەک هەر پێشێلکردنی سەروەری خاکی عێراق و پاکتاوکردنی ئەندامانی نەتەوەی کوردە، بەڵکو پێچەوانەی هەموو ئەو واژۆیانەشە کە لەسەر کۆی ئەو ناوەڕۆک و بەند و مادانەی ناو بەیاننامە نێونەتەوەییانە کراون کە داکۆکی لە ماف و ئازادی نەتەوەیی و ئاین و مەزهەبە جیاوازەکان دەکەن.
هەر لەو بەیاننامەیەدا، کەسوکاری ئەو شەهیدانە، داوایان لە حکومەتی هەرێمی کوردستان و پەرلەمانی هەرێمی کوردستان و ئەنجومەنی دادوەری هەرێم و حکومەتی هەرێم و عێراق و تەواوی لایەنە پەیوەندیدارەکانی ناوخۆیی و بیانی کردووە، کە خاوەنداریەتی لە دۆسییەکەیان بکەن و هاوکاریان بن، لە بە دادگایی گەیاندنی دەوڵەتی تورکیا لە دادگای لاهای و دادگاکانی تری گرێدراو بەم کەیسە.
هەروەها، ڕاشیانگەیاندووە:”با ئێمە بە هاوکاریی ئێوە دەوڵەتی تورکیا و سەرۆکە فاشیستەکەی دادگایی بکەین”.
ش.ف
