سینەما سالم یادی سێیەمین ساڵی دامەزراندنی كردەوە

سێیەمین ساڵیادی دامەزراندنی سینەما سالم بە مەراسیمێك لە شاری سلێمانی كرایەوە، سینەما سالم یەكێكە لە سینەما هاوچەرخەكانی هەرێمی كوردستان و خزمەتێكی بەرچاوی بە كلتوور و سینەمای كوردی كردووە.


ئێوارەی ئەمڕۆ لە هۆڵی سینەما سالم لە شاری سلێمانی، مەراسیمی سێیەمین ساڵیادی دامەزراندنی سینەما سالم بەڕێوەچوو.

لە مەراسیمەكەدا ژمارەیەكی بەرچاو لە هونەرمەند، سینەماكار، ڕۆشنبیر و كەسایەتییەكانی شاری سلێمانی بەشدارییان كردبوو و چەندین چالاكی جۆراوجۆریش لە مەراسیمەكەدا بەڕێوەچوو.

سەرەتای مەراسیمەكە بە پارچە میوزیكێك دەستیپێكرد، پاشان ڕاپۆرتێك لەسەر كار و چالاكییەكانی سێ ساڵی تەمەنی سینەما سالم نمایشكرا.

هەر لە مەراسیمەكەدا، هەوراز محەمەد، فیلمساز و ئەندامی بۆردی دامەزراندنی سینەما سالم قسەی لەسەر شێوازی كار و چالاكییەكانی سینەما سالم كرد، هەروەها پرۆژەكانی داهاتووی سینەماكەی ئاشكراكرد، كە بریتین لە دەركردنی گۆڤارێكی تایبەتمەند بە سینەما، كە پێدەچێت لەمساڵدا بكەوێتە بەر دیدەی خوێنەران، لەگەڵ ئەوەشدا گەیاندنی فیلم بە كۆڵانەكان و شوێنە دوورە دەستەكان بۆ ئەوەی زۆرترین كەس بتوانین فیلم ببینن.

سینەما سالم ساڵی ٢٠١٦ لەلایەن ناوەندی غەزەلنووس-ەوە دامەزراوە و لە ئێستادا یەكێكە لە سینەما هاوچەرخەكانی هەرێمی كوردستان.
لەماوەی سێ ساڵی تەمەنیدا سینەما سالم هەزاران فیلمی سینەمایی كوردیی و جیهانیی نمایشكردووە، تاوەكو ئێستاش ٤٠٠ فیلمی بیانیی وەرگێڕاوەتە سەر زمانی كوردیی و نمایشیكردووە.

لە پاڵ ئەوەشدا هەمیشە دەرگای هۆڵەكەی بەڕووی چالاكییە هونەرییەكاندا واڵابووە، ساڵانە چەندین كۆڕ و سیمیناری ئەدەبیی و كۆنسێرت لە هۆڵی سینەماكەدا بەڕێوەدەچێت.

لە مانگی یەكی ئەمساڵیشدا سینەماكە بەهۆی ئەوەی ویستی فیلمێك لەسەر ژیان و تێكۆشانی ساكینە جانسز، ژنە شۆڕشگێڕی گەلی كورد نمایش بكات لەلایەن ئاسایشی سلێمانییەوە بۆ ماوەی دوو ڕۆژ دەرگای هۆڵەكەی داخرا.

د.ح