دووشەممە, 18 يون 2018 – 11:18 ڕۆژنیوز ـ قەندیل
هەوڵدانی دەوڵەتی تورک بۆ داگیرکردنی باشوری کوردستان بەردەوامە و لەبەرامبەردا دانێشتوانی گوندەکانی قەندیل لە گوندەکانیان ماونەتەوە و چۆڵی ناکەن.
هەیفا حەسەن، گوندنشین لە بناری قەندیل هەوڵدانی داگیرکاریی دەوڵەتی تورکی شەرمەزارکرد و بە ڕۆژنیوزی وت: هەموو ژیانمان لەم گوندە بەڕێکردووە و خەڵک بە کشتوکاڵ و ئاژەڵداریی ژیانی خۆی بەردەوام دەکات، ئەگەر ئەمڕۆ تورکیا بکەوێتە ناو هەوڵدان و بکەوێتە قەندیل، ئەوا بێگومان ئێمە هەڵوێستمان دەبێت دژی دەوڵەتی داگیرکەر و حکومەتی ئەردۆغان.
هەیفا وتیشی: پێویستە حکومەتی عێراق و لایەنە سیاسییەکانی باشور لە بەرامبەر داگیرکاری تورک بێدەنگ نەمێنن و هەڵوێستی توند نیشان بدەن، هەروەها پێویستە لەبەرامبەر ئەو فاشیستیەدا کورد لە هەر چوار پارچەی کوردستان یەکگرتوو بن، گەلی کورد هەمیشە بە یەکگرتن سەرکەوتووە، ئەگەر ئەمڕۆ دیسان یەکگرتوو بین ئەوا دەوڵەتی تورک ناتوانێ لەبەرامبەر کورد هێرش بکات.
محەمەد حەسەن، گوندنشینێکی دیکەیە، وتی: “ئەمڕۆ دەوڵەتی تورک داگیرکاری دەکات بە هاوکاری و پشتگیری هەندێک لایەنی سیاسی و دەوڵەت، دەڵێن کە ئێمە هێرشی سەر پەکەکە دەکەین، ئەوە ڕاست نیە، بەڵکو ئامانجی ئەوان داگیرکردنی چوار پارچەی کوردستانە”.
محەمەد وتیشی:” دەوڵەتانی داگیرکەر هەمیشە بە فڕۆکە و چەک ویستویانە کە کورد شوێنەکانی خۆی جێبهێڵێت، بەڵام ئێمە دەست لە گوندەکەمان بەرنادەین گەر دیسان هێرشیش بکەن”.
شاکار محەمەد، گەنجێکی گوندنشینە و داگیرکاری دەوڵەتی تورکی شەرمەزارکرد و وتی:”دەوڵەتی تورکی داگیرکەر دەیەوێت خۆشیی لەناو خەڵکی ئەم هەرێمە نەهێڵێت، بەڵام ئێمە وەک گەلی کورد دەتوانین بە یەکێتی نەتەوەیی ئەو هێرشانە پوچەڵ بکەینەوە، گەر ئێمە یەکگرتوو بین ئەوا جارێکی دیکە ناتوانێت بێتە سەر خاکەکەمان”.
شاکار، وتیشی:”میدیاکانی تورکیا دەیانەوێت بە هەواڵی ناڕاست هەندێک شت بەدەستبهێنێت، ئێمە هەموومان لە گوندەکەمانین، نەک تەنها دەوڵەتی داگیرکەری تورکیا، بەڵکو دەوڵەتانی دیکەی داگیرکەریش بێن ئەوا خاکەکەمان بەرنادەین، لەبەرئەوەی لە دژی داگیرکاریی پشتگیری گەل بەهێزبووە”.
